Tanja Sanila lea vuoitán nuortalaččaid ovdaolbmoválggaid. Sanila leage vuosttaš nissonolmmoš dán nuortalaččaid alimus luohttámušdoaimmas.
Yle Sámi doaimmaheaddjit deaivvadeigga Sanilain njuolgga válgavuoittu almmuheami maŋŋá.
Ná Sanila govvidii dovdduidis válgavuoittu maŋŋá.
– Vuoi dette go lea fiinna dovdu, dat lea jáhkkemeahttun! Vuosttaš nisu ovdaolmmožin - dahje ovdanissonin dál, illudii Sanila.
– Gal lea fiinnis. Dát lea fiinna joatkka mu sámi leanadáiddárkarrierii, álgit 1.1. ovdaolmmošin. Vuoi dette. Dál orru ahte nuortalaččat dorjot mu ja dat lea buorre vuolggasadji.
Sanila jáhkká ahte su evttohasvuohta loktii jienastanproseantta
Sanila oaččui válggas 103 jiena. Oktiibuot válggas addui 228 jiena ja jienastanproseanta lei 48, go dat ovddit válggain lei 37 proseantta.
Dálá ovdaolmmoš Veikko Feodoroff oaččui 95 jiena ja ovdalaš ovdaolmmoš Sergei Kp. Fofonoff 29 jiena.
Sanila mielas dat ahte son álggii evttohassan movttiidahtii eambosiid jienastit.
– Gal mun lean sihkkar, ahte mu evttohasvuohta dasa váikkuhii. Oalle jaskathan jienastemiin lea leamaš ovddit válggain, Sanila bohkosa.
– Buorrehan lea ahte jienastanproseantta loktanii. In muitte goas maŋimuš ovdaolbmoválggain livčče beassan dakkár jietnameriide, son joatká.
Sanila áigu bargat vai olbmot searvvašedje giličoahkkima doaimmaide
Tanja Sanila (s. 1979) bargá dál sámi leanadáiddára sadjásažžan. Son lea vázzán Lappi universitehta ja lea dáidagiid magisttar.
Sanila lohpida bargat dan ovdii, ahte olbmot searvvašedje giličoahkkima doaimmaide.
– Jus olbmot eai ieža áŋgirdišgoađe, de mun gal álggán sin oalgguhit. Dat galgá šaddat min buohkaid áššin. Eat seagut dasa politihka, muhto galgá leat nu, ahte juohke nuortalaš návddaša go bargá min kultuvra ovdii ja bargat ovttas.
Njellima luodda ja nuortalaš kulturguovddáš Sanila váimmu lahka
Ođđa ovdaolmmoš Tanja Sanila áigu ovddimussan bargagoahtit Njellima luottain ja nuortalaš kulturguovddážiin.
– Dieđusge oahpásnuvan álggos dán ođđa ámmáhii. Muhto gal dat Njellima luodda ja nuortalaš kulturguovddáš leat mu váibmoáššit. Ja dan maŋŋá bohtet dat unnit áššit, linnje Sanila iežas bargguid ovdaolmmošin.
Guldal eambbo válgaságaid min Bures ain -sáddagis, mii álgá diibmu 15:05!
